EZ LAPURTU GURASOEI
HAIEK HERENTZIAN
UTZI EZ DIZUTENIK

Aitortzarik gabe hil zirenen omenaldi

gisa darabiltzagu sarri gure pausoak.

Azalean nozitu ez ditugun erasoak

kemen iturri dira, eta ez txakalaldi.

Zaurien narrazioa ote gurasoak?

Bere larruan bizi zituenak aspaldi

uko egin bazion mendekuari, soak

zaldi prestu bitez ahapaldiz ahapaldi.

Irakurrita pasa orrialde leituak;

apaleko orbainez osaturik geruza,

gogoan gorde baina ez berpiztu pleituak.

Gozatuak oroit, bada; ez dolua luza.

Bizitza dira pilatutako liburuak:

flyscha da gogoa eta flyscha da gorputza.