LIBURUTEGI PARALELOAK

Nobedadeak iritsi ziren eguerdian,

mahaietan ordenatzera joan nintzen.

Ikusi nuen liburu bat eta pentsatu:

hau erosiko nioke

ala:

honen bi ale erosiko nituzke,

bata niretzat, bestea berarentzat

ala:

bakarra erosiko nuke baina gero

utzi egingo nioke, interesgarria balitz,

ala alderantziz.

Orduan kezka sentitu nuen

liburutegi paraleloekiko.

Zeren demagun orain bizi naizen etxeak

lurra jotzen duela. Azken batean

eraikinaren oinarria betoi armatua da

eta ez dakigu zenbat iraungo duen.

Antonio Aretxabala geologoak

adierazi zuen 2020ko abuztu bitxi hartan:

Iruñean betoi armatuz egindako

eraikin zaharrena 1923koa da: zezen plaza.

Kezka horrekin hasi nintzen aspaldi,

liburutegi paralelo nagusiko

liburuzaina hil zitzaidanean ulertu nuen:

bizidunon liburutegiek

bizirik behar dituzte liburuzainak.