Sortaldekoak
Sortaldekoak
2021, poesia
136 orrialde
978-84-17051-72-3
Azaleko irudia: Alain Urrutia
Hedoi Etxarte
1986, Iruņea
 
2012, poesia
2008, poesia
 

 

MALETA

 

 

Badakit hau ez dela momentua.

Baina oroitzapenak maleta batean

sartzen ari naiz, presaka, denak nahastuta,

biharamunean ihes egingo duen

azken trenean joango den

erbesteratuaren bezperan banengo bezala.

 

Sartu dut

letra zuriko

Hotel Tres Reyesen

afixa zahar urdin erraldoia,

Belatetik jaitsi eta Eltzarrain gurutzatu aurretik

errepidetik larrean ikusten dena.

 

Sartu dut 92ko uztailean

Arnaoutchotetik Sanferminetara

Frankfurteko eibartarrekin

egindako ihesaldia, gozokiak saltzen

zituen Xabier karrikako

andre zahar txikiari

erosi genizkion zapi gorriak.

 

Sartu dut maletan

paper satinatuzko koloretako

aldizkarietako iragarki bateko

kolonia muestra bat.

 

Sartu dut

2019ko Gabonetan

egin zenidan bazterrekoa,

oskola eta harria itsatsita dauzkana.

 

Sartu dut Toulousen erosi genuen

itsulapikoa, Marxen burua duena,

argazkiak, markagailuak, zure ur margoak,

zurezko pieza batzuk sartu ditut

biharamunean ihes egingo duenak bezala.