INSTITUTU ALDAKETA

2003ko ekainaren 2an irakasleak

Historia eman behar zigun

baina eskola hasi aurretik galdetu zuen

zer gertatu ote zen aurreko egunetan.

Ezaguna zen Nieves

eduki politikoa zuten afixak

gelatik kenarazten zituelako.

Egun batzuk lehenago ETAk

Bonifacio Martin eta Julian Embid

poliziak hil zituen Zangozan.

Garai hartan indarkeriaren kontra nengoen:

zetorren tokitik zetorrela,

testuinguru guztietan.

Irakasleak azaltzen zizun

Ekonomia Politiko Berria

Stalinek abiarazi zuela, adibidez.

Ez nuen eskola hartan hitz egiteko

asmorik, baina aurreko larunbatean

Jose Maria Aznar presidentea etorri zen

katedraleko hiletara,

Poliziak auzoa okupatu zuen

eta ezin izan nintzen nire kalean sartu.

Esan nuen absurdoa iruditzen zitzaidala

Iraken kontrako gerra hasi zuen gizona,

milaka zibilen heriotzaren erantzulea,

Iruñera etortzea bi gizon horiek

hil zituztenei “hiltzaile” esatera.

Irakaslea, metro eta erdiko emakumea,

garrasika hasi zitzaidan

negarrari eman nion arte,

indarkeria justifikatzen omen zuten

nire hitzek.

Ez nuen gainditu hiruhilabetea.

Irakasleari esan nion azterketa

aitak ikustea nahi nuela,

esan zidan zergatik etorri behar ote zen bera,

esan nion adin txikikoa nintzela.

Tutorearen babesa izan nuen,

zuzendaritzak beste alde batera

begiratu zuen, ohiko praktika zen

irakasle horrena.

Alde egin nuen, azken urtea han ez egiteko,

horrela iritsi nintzen institutu berrira.