AURREZKI KUTXA

Bere seme txikiarekin

aurrezki kutxaren bulego nagusira

joan zen Pilar Berezibar Galdos,

Karlos III.a etorbidera.

Kontu bat ireki nahi zion

haurrari. Bulegariak

izena galdetu zion

eta Pilarrek esan:

— Aitor.

Eta bulegariak:

— Ezin diot halako izena duen

norbaiti konturik ireki,

izen hori ez baitago santutegian.

Nabarmena zen afera ez zela erlijiosoa,

baizik eta politikoa.

Orduan Pilarrek bulegariari

esan zion bere nagusia dei zezala,

propaganda egiten ari zirela

haurrei aurrezki kontuak irekitzeko

baina gero ez zela posible.

Etorri zen nagusia,

azaldu zioten egoera eta

bulegariari esan zion

irekitzeko kontu bat Aitorri,

santutegiak ez zeuzkala euskarazko izenak

baina haur aleman bat etorriko bazen

ere ez zela santutegian izena agertuko.

Baina ez ote zen nagusia, azken batean,

60ko hamarkada hasiera izateko

garaiari aurreratutako feniziar bat,

bere politika enpresa politika.