Sortaldekoak
Sortaldekoak
2021, poesia
136 orrialde
978-84-17051-72-3
Azaleko irudia: Alain Urrutia
Hedoi Etxarte
1986, Iruņea
 
2012, poesia
2008, poesia
 

 

 

ESKOZIAKO BANKUA

 

 

Niretzat Eskozia gauza asko ziren

baina, bereziki, gure haurtzaroan

aitak gehien desiratu zuen munduko tokia.

Eta hala joan ginen, Pride of Bilbao ferryan,

eta gurutzatu genuen uhartea Portsmouthetik

abiatuta bolantea kontinenteko aldean

zuen gure kotxean.

 

Jan genuen fish and chips Aberdeenen,

erosi genituen golf makila bat eta hiru pilota,

zeharkatu lochak eta lo egin

Skye uharteko kanpinean, paseatu Dundeen

eta nazka eman ziguten, aurrenekoz, kaioek.

 

17 urte nitueneko udan itzuli nintzen Eskoziara.

Hartzen nuen bus bat hiriaren hegoaldetik

ingeles eskolak jasotzeko eta

eskatu nuen, aurrenekoz, dirua kalean

biolina jotzeagatik.

 

Royal Mileko kalezulo batean

izan nuen nire laugarren sexu harremana

emakume batekin.

Zen neska italiar bat nire adinekoa,

ingeles eskoletakoa,

oso musukatzailea eta erretzailea,

bidean garagardo lata bat edan zuen,

eseri ginen atari batean,

lurra zen hotza, harrizkoa.

 

Garai hartan uste nuen

musuaren funtsa bestearen

ahoan mihia sakon sartzea zela.

Neukan zakila tente,

min ematen zidan bakeroetan.

Dena zen poliki eta goxo,

dena kostatzen zen baina pasioa zerion:

bere sorbaldetara iristea,

bere bularretara, areolak miazkatzea,

elkarri eskuak praketan sartzea.

 

Ez naiz oroitzen ze bankutakoa zen

guztia gertatu zen sukurtsala

baina Edinburgok duen kokapenarengatik

erabaki nuen Eskoziako Bankuan izan zela dena.

 

Egun batzuk geroago, Hoyrood Parken

paseatzen ari nintzen zaharragoa

zen ikastaroetako Bilboko gizon batekin

eta neskaz hasi zitzaidan hitz egiten.

Arinkeriaz esan zuen ederra zela

baina “kanpaia” besterik ez zuela jotzen.

 

Pena eman zidan entzuteak,

zuretzat samurra dena

norbaitek mespretxatzea.

Gero, errukia sortu zidan hortz hori eta

betaurreko borobileko gizonak,

begiratu nuen etorkortasunez,

sexua bera baino neska gazteagoekin

bakarrik izan zezakeen beste gizon

bat baino ez zen.