BIZITZA ZEN

Ikusten ditut Donibaneko edadeko emakumeak

gurpildun aulkian, burusiak zangoetan,

eta atzetik bultzaka Kolonbiako emakumeak.

Badakit errentan nor den ahulena.

Badakit osasunean nor den hauskorrena.

Ikusten ditut zaintzaileak sakelakoari

jaramon handiagoa egiten

zainduen hitzei baino.

Baina kasu bera egiten diete aitek

orgatxoetan paseatzen dituzten haurrei.

Ez dakit. Gaurko arratsa beste noizbait

errepikatu izan balitz bezala.

Garrantzitsua da bultzatzen den orgatxoa.

Gainean pixa egitea,

zangoetan burusi bat eramatea,

ingurukoek inolako jaramonik ez egitea,

ingurukoek norbait ordaintzea guri jaramon egiteko

eta halere soldatapeko pobre horrek ere

kasurik ez egitea.

Garrantzitsua da bultzatzen den orgatxoa.