80

Vinarium

Urtarrilaren hasierak. Gure lehen asteburu-pasa. Bordele.

Vinarium izeneko ardandegi batean sartu gara. Izen zuhurra bodegarena, keinu bat kode binarioari. Kode bitarra astronomian erabiltzen da indar grabitatorioa dela medio lotutako astro biri buruz jarduteko.

Komunean, château chic baten grabatua. Kuriosoa kasualitatea

:

Domaine de la Solitude-tik

Domaine des Grandes Espérances-era al goaz?

Orain ahuspez nago, pilpiraka, nenufar sukartsu bat.

V bat marraztu diot Victorri paparrean hatzarekin

:

garaipenaren ikurra,

                         hegazti baten soslaia,

                                       izen baten iniziala.

            “Ça va? Ondo?”.

Bere ahotsak atera nau eskema minimo horretatik.

Izar bi gara masa-zentro komun batean biraka.