125

Nire zorabioa

Lur-bikorrak dauzkat ahoan

eta

gaua zurituz, zurituz doa.

Zorabio txarrak narama Victorren ezpainetara.

Victorren ezpainetatik Martinen eskuetara.

Martinen eskuetatik Iratiren lerroetara.

Iratiren lerroetatik Ebaren oihuetara

(estera batean hegan).

Ebaren hegazkadatik Hurbiltzailearen hortzera.

Hurbiltzailearen hortzetik bioleta urdin batera.

Bioletatxo urdinetik Cocker-begi zuhurrera.

Cocker-begi zuhurretik ahate aldra batera

(urtegian liskarrean).

Ahateen liskarretik Daniel Booneren barrera.

Daniel Booneren barretik Snowren txokolatera.

Snowren txokolatetik Mallonaberri grisera.

Mallonaberri grisetik Amaiaren negarrera

(lotuta bere ohantzean).

Amaiaren ohantzetik Ladyren ospitalera.

Ladyren ospitaletik El Konkisen muturrera.

El Konkisen muturretik Wakoskiren orri artera.

Wakoskiren orri artetik Mikelen ile luzera

(bere kala paparrean).

Mikelen kala zuritik Gardenaren sudurrera.

Gardenaren sudurretik basabide ilunera.

Basabide ilunetik nire bunker erdi hutsera.

Nire bunker erdi hutsetik mingain arrosa batera…

Norena da mingain adurti hau?