70

Ahuntzaren izendegia

Barraskilo eta triku, hontz eta katagorri!

Orain ahuntz bat daukat eta ez, ba, nigana etorri!

Lankideek izena jakin nahi izan zuten.

“Margarita, ijitoen ahuntzarena”.

Akrobaziak eginarazten zizkioten

eskaileratxoan gora, eskaileratxoan behera.

“Margaretatwood” egiten diot garrasi,

umore onean banaiz.

“Margaretmahy” egiten diot xuxurla,

ume sentitzen naizen une solteetan.

“Margaretmitchell” egiten diot ahapeka,

haizeak zer edo zer narras daramanean.

“Margueriteduras” egiten diot hasperen,

maitaleren batekin akordatzerakoan.

“Margafrantziako” egiten diot marmarka,

nire etxe-gazteluan giltzapetzeko orduan.

“Margomargoglantz” egiten diot isilka,

neu imajinatuta pertsonaia handi gisa.

“Yourcenar eta kito”,

indartsu banago.

Saltzaileak ea zertarako nuen galdetu zidan.

“Bizia salbatzeko…, baina neurea”.

Zelan hartu zuen txaraka estreinako egunetik,

triska-triska eginez asun, lahar eta sasi!

Barraskilo eta triku, hontz eta katagorri!

Orain ahuntz bat daukat eta ez, ba, nigana etorri!