54

Gerra zirkularra

Edurne lunbagoak jota dagoenez,

ezin izan du egunotan Amaia artatu.

Ukabilak estutu ditut ikustean

tipula lizunduak frutaontzian,

           zigarro-mutxikinak fregaderan,

                         aldizkariak botata denean.

Logelak naufragio bat dirudi.

Ohepetik ageri diren arropek, itotakoen besoak.

Ahizparen kuxidadea miatzen ari naiz

:

betondoa, zapi beltza;

ahoa, maskor ezdeusa.

            “O so ne ka tu ta na go”.

            “Benga, Amaia, dutxara”.

            “U tzi ba ke tan…

            Uz te ko ba ke tan!

            Zu e zin za ra sar tu

            ni re bu ru ko a rra ka le tan”.

Zer da tragikoago gerra zirkular bat

norberaren kontra libratu beharra baino?

Laurari deitu diot.

Ingresatzea izan da gomendioa.