100

Kamisoiak eta pijamak

Lady Laurarekin geratu naiz

Edurneren egunerako oparia hartzeko

:

maleta berri bat, Imsersozaleen poza.

Berak bestelakoak ere eskuratu ditu.

            “Zeuk erosten diozu arropa Martini, ala?”.

            “Normalean ez, baina hain dabil,

            zelan esan, hain dabil mimosito…”.

            “Dena ondo, ez?”.

            “Tira, ez gara lehengoak, ezin izan.

            Boladak eta boladak…

            Aizu, hau gustatzen zaizu?”.

Dotoreziaren kintaesentzia aukeratu du,

gasazko kamisoi gorri tirantedun bat.

Nik loredun bat beherapenen sailetik hartu

eta probatzeko imintzioa egin dut.

            “Mesedez… Estilista bat behar duzu”.

Pijama termiko bi apartatu ditut azkenerako,

Amaiak eta biok basoko hozkailuan bizirauteko.