101

Gizon Kaladuna

Berriz egin dut topo Mikelekin.

Marko Polo dakar gaur,

bull terrier belarrimotz bat.

            “Behin ezagutu nuen dalmata koitadu bat…

            Orban urdinak zituen, pentsa…

            Urteetan eduki zutelako soto batean lotuta…

            Kolorea mudatu zitzaion argi faltagatik…

            Kanpoan ez zuen egin astebeterik ere…

            Kataratak, hortzik ez…

            Kalte psikologikoak ez aipatzearren…”.

Mauri begira nago, zein gustura dabilen muturka

urtegi ertzeko lohietan.

Janari-banku oparoa da toki hau benetan.

            “Animaliak jagotea zera da niretzat…

            Oreka naturalari laguntzeko modu bat…

            Existentzia poesiatik ulertzea…”.

Horrelako esaldiek lurra pitzatzen didate

oinen azpian. Mistiko bat, Dios!

            “Poesiazalea, ala?”.

            “Erabat… Guztiz…

            Sariren bat ere irabazi dut…”.

Artobero-usaina zabaldu da.

Becquer bat daukat parean, perilla eta guzti.

Oi, lore-hautsaren mantelina urak janzten!

Oi, kardulatzak udalehenaren irriei deitzen!