14

Bioletak?

Edozer izan daiteke aztarna bat.

Zein zituen I.B.k

lagun hurkoenak,

           sare digitalak,

                    agenda eta abar?

Bere takilla (kaiola morboso hori)

zabaldu diet ertzainei.

Hustu eta alde egin dute.

Ezustean,

zertzelada batek egoera birdimentsionatu du

:

metalaren sargune batean papertxo bat dago

kuzkur-kuzkur eginda,

arkakuso bat altzari baten molduran bezala.

Azazkala apurtu zait atera nahian.

Paperaren aurkian, testu bat.

            Bioletak hazten zaizkit ezpainen bueltan. Udaberriko

            euriak bustita.

            Beren urdinak gogorarazten dit

            zein ederrak

            izan daitezkeen

            bakarrik dauden gauzak.

                                                       Diane Wakoski

Paperaren ifrentzuan, telefono bat.

Jakin nahi nuke zer zerabilen I.B.k buruan.

Jakin nahi nuke zer dela-eta zegoen bakarrik.

Nor ostia da, ba, Diane Wakoski?