137

Bentosa eta ote-larrea

Ezker bularra haztatzean ia ez dut bihotza sumatzen.

Urrun egiten du dun-dun,

zalantzan jartzen diren maitasunek bezala.

Behar zuena baino gutxiago eman diot.

Beti ez dugu denbora nahikorik izaten

gure ezgaitasunak artezteko.

Ote-larreak lustrea galdu du leihotik hara.

Bentosa batek xurgatzen nau barrurantz.

Eta, isiltasunera lerraturik,

ezker bularra

           eta gingila

                 eta hezurrak,

jakitun nire minaz.