21

Hegaztien babesleak

Hegaztizaleak dira.

Horregatik ematen diete presako ahateei bazka.

Horregatik basoan sinfonia

:

gargarak,

                 kua-kua-kuak,

                                          karrankak.

Iratzarri egiten naute larunbatero

agure batek eta horren semeak,

biok flanelazko alkandorak soinean.

Uretan, ogi-tatoak jitoan,

tripa-kailu gordinen irudiko.

Gauean, metano-putzak ikusten dira ertzetan,

usteltzear den materiaren korrokak.

            “Konforme nago fauna babestearekin,

            baina gero eta arratoi gehiago dago

            eta ni hurbil bizi naiz”.

            “Ez da hainbesterako izango”

            muzinka agureak, bizkarra braust emanda.

Semea adurretan daukat begira,

marrazki biziduna-edo banintz bezala.