47

Daniel Boone and Company

Txakurrari sendatu zaizkio oinpeetako mamiak.

Biok dakigu etxean ez dugula alarmarik beharko.

Dagoeneko.

            “Goazen presaraino, Mau”.

Lata herdoilek,

         plastiko xaharrek,

                        ahate aldrak,

                                   Daniel Boone senior

                                               eta juniorrek

garauak ateratzen dizkidate.

Bibrazioak uretan, arratoiak.

Surrealista da ekomania hau erreprimitu beharra.

            “Ez botatzeko ogirik, mesedez”.

            “Orain arte ez da inor kexatu”

            desairea agureak, surtziloan aztarrika.

Semea eskotera daukat begira,

porno-star bat-edo banintz bezala.

            “Ez eman paitei jaten,

            salaketa bat jartzea gura ez baduzue”.

            “Zu Olearen alaba zara, ezta?”

            purrusta agureak, mingaina erakutsita.

Aitaren bat-bateko gomuta igo zait,

birikak erdibituz, orpoetatik ahora.

Kabroi hori baietz izan

Firestone sasoiko eskirol ostiaren bat.