35

Fabula arrunta

Neguak oso astunak ditu adarrak.

Zintzilik dauzkate

kontzertu tiketak,

                   egutegi orriak,

                                 lehengo argazkiak

eta zure arima matxinsalto bihurtzen zuten

bidaietako postalak.

Lurpean beste gauza batzuk dituzu gordeta,

baliabide abstraktuagoak, hala nola

izen bat

etxeak itotzen bazaitu ahoskatzen duzuna.

Argizuloa zikin dago.

Bihozmina zuria da eta ez da bereizten

ez olatuen gandorretatik,

ez gaixorik dauden haurrek edaten duten esnetik.

Txori bat leize batetik irteten ari da,

mokoan zinta gorri bat daramala.