27

Estiloak eta beste

Fotokopiak uztera sartu naiz irakasle-gelan.

“Sano maja, bizkorra, heldua”. “Bere klasekoak baino nagusiagoa zen, ezta?”. “A bai? Baina ez errepikatzailea zelako”. “Urteren bat galdu zuen hona etorri baino lehen”. “Bi ikasturte. Han-hemen bizi izan dira eta…”. “Beti ibiltzen zen Laia Lopezekin. Hori bada errepikatzailea”. “Gurasoak banatu eta gero hasi zen gurean”. “Gurasoak ere majoak... Beno, ama. Ama da bileretara etortzen dena”. “Akordatzen zarete Ana Tere Barruetaz?”. “Uf! Bere baserri ondoan hilda agertu zena? Loiukoa? Berrogei bat urte izango dira. Itzela izan zen hura. Orduantxe nengoen karrera hasita”. “Donostia aldean ere hil zuten beste bat… Nola zuen izena?”. “Krimen horien atzean faxismo parapoliziala zegoen baina. Grebak eta protestak antolatu ziren”. “Ni Santutxukoa naiz, Virginia Acebesen kalekoa. Hari ere txakur-ileak topatu zizkioten. Hortik harrapatu zuten psikopata hura”. “Shaolin monjea baino psikopatagorik…”. “Bederatzi-hamar urte trulloan eta kalera”. “Lotsagarria da”. “Ez dago eskubiderik”. “Programa batean esplikatu dutenez, eskuekin hiltzeak esan nahi du hiltzaileak motibazio pertsonalak dituela”. “Asesino gehienak umetan tratu txarrak jasandakoak ei dira”. “Eta?”.