59

Txakurrak eta sozializazioa

Ez nuen usteko txakur batek

nire harreman sorta aberastuko zuenik.

            “Basoko bi dama…”.

Horixe bota du bion parean. Zin dagit.

Pistan behera zetorren, hautsa harrotuz.

Mau olgetan hasi da haren boxer mantxuarekin.

            “Zelan dauka izena?”.

            “Ez dakit, txakurtegikoa da…

            Basajaun esaten diot…

            Eta ni Mikel naiz…”.

            “Mau eta Agurtzane”.

Argi-tirrinta batek

ile luzea isiotu dio istant batean,

bere xarmen azentu.

Hala ere, deserosoak zaizkit

ume-begi lañoak,

         gorputz merro mendrea,

                        kamiseta kursia

:

serigrafia bat, kala batena.

Non ikusi dut nik lore hori?

Euriak eten dizkit kalkuluak.

Gizon Kaladuna badoa.

Tantak zerbait idazten dabiltza lurrean,

deszifratzea lortzen ez dudana.