63

Thrillerrak eta errebelazioak

Ezezagun bat gauean,

                      hormako mehatxu latza,

                                        txakurraren lo kaxkarra,

hiru misterio batean.

Eta telebistan, aspaldiko thriller bat.

Uma Thurman itsua da eta Andy Garcia detektibea.

Maitemindu egingo dira ikerketa endredatu ahala,

baina hori ez da ardatza.

Abiapuntua zabortegi bat da

—zabor-poltsa bat zehazkiago,

ehunka poltsa hori, beltz eta laranjaren artean—.

Euria zarra-zarra ari du, gaua dator.

Hildako eskaleak hiru ebaki ditu zintzurrean,

gerezi-konfituraz eginiko kanesu antzekoak.

Agenteek ez dute kakatzan ibiltzeko gogorik.

            “Noiz arte geratuko gara?

            Ez dakigu zeren bila gabiltzan!

            Aizto bat al da topatu behar duguna?”.

Horra arte suspensea pizteko estrategia.

Eta orduan…

            “Aizu, jefe, zerbait dago hemen!”.

Kamerak fokatzen duenerako uzkurtzen zaizu urdaila.

Esku bat agertu da lohien artean, zizarez borborka.

Linternak hain gordin erakutsi ezean,

portzelanazko xaboi-ontzia lirudike.

Zure zinta birbobinatzeari ekin diozu.

M.ren etxera joan zinenean gauzak batzera

(artean bazeneukan giltza),

 norabait alde eginda zegoen,

zarama baldean utzita.

Salda nabar bat isurtzen ari zen baldetik

eta har-kolonia bat euforiaz irakiten

arrain-tripa,

fruta-azal,         

kafe-hondar                   

eta beste                                 

miseria txungorekin nahastean.

Dena garbitu zenuen,

espartzuz eta lixibaz domestikatuz

goragalea.

Berez eratu zaizu analogia

:

zure eskua ere han zen, anputatuta,

maiteño ohiaren zaborrontzian.