22

Nire ahizpa

Ahizpa gazteago bat daukat

eta

gaixorik dago antzinatik.

Ezorduetan deitzen didanean,

orratzez betetzen zait gaua.

Baina elur-maluta bat da bera, itsasoan urtzear.

            “Zir ku ko e kin na go!

            U me a e ka rri du te!”.

Behinola, zirku kalamastra bat etorri zen

:

pailazo konkorduna,

elefanta tuntuna,                     

toldo zarakarduna.                             

Sasoi berean, ume bat desagertu zen

gure blokean,

sekula berriz azaldu ez zena.

Goizeko hirurak dira.

Non sartu da zaintzailea?

Sofan aurkitu dut Amaia,

kamisoia ugerdo,

                 negar-zotin itxian,

                            panpina bat altzoan.

Gero, bostak aldean,

takoi zorrotzen hotsa,

          giltza-bueltak sarrailan,

                     aitzakien murduska.

            “Largo. Fuera. Vete. Ospa”.

Umetan, eskua ematen nion ahizpari

ohe bikien gainetik,

amesgaiztoak zituenean.