56

Miss Fletcher

Martin harro dago bere lanaz.

Pa bat eman dio ahoan Laurak.

Arretaz aztertu du sala bikote idealak,

jostorratza eta haria,

                    ozpina eta gatza,

                                  ispilua eta isla,

                                              musua eta antifaza.

Almibarra darie, pertsona konpletoen desmasia.

            “Kaktus bat ekarri dizugu.

            Ez du mimorik behar, zeure antza dauka”.

            “Afari bat zor nizuen” diotset,

            sukaldetik arrain-zopa dakardala.

Edozein juntadizo girotuko dizute solasera ekarrita

modako errezetak,

                eski-estazioak,

                         inbertsio-fondoak,

                                          arte-erakusketak.

            “Geldi dago Irati Berazaren kasua” diotset,

            mahaitik plater hutsak jaso ahala.

            “Ez zaitez obsesionatu, Miss Fletcher”.

Martinek sorbalda tinkatu dit.

Ilea goxoki nahastu dit Laurak.