Europako kultur hiriburua I

1992. urtean Madril Europako Kultur Hiriburu izendatu zuten. Uda hasiera hartan nire bizitzako lehen lan profesionalak egin nituen. Miguel Narrosek zuzendu zuen Fiesta barroca kalejira antzerako bat eta, ondoren, Plaza Mayorren ematen zen Pedro Calderon de la Barcaren El gran teatro del mundo.

      Beste lau aktorerekin batera, gure lana kalejiraren barruan egiten genuen, maskarada haren barruan deabru papera jokatuz. Arnold Taraborrellirekin landu genituen koreografiak. Palacio Realetik hasita Plaza Mayor-erako ibilbidean publikoarekin jolasten genuen, eta entseguetan gure artean adostutako ekintza batzuk egiten genituen. Lana bera ez zen zirraragarria, ez zen beste munduko gauza bat, baina hainbeste parafernalia artean gauza batek atentzioa eman zidan memento batean: nik irabazten nuena baino garestiagoa zela neraman jantzia. Garai hartako 500.000 pezeta (3.000 euro) balio zituen, eta honek ez zidan batere graziarik egin. Ikuskizun hartan bazegoen zerbait ez zitzaidana gustatzen, eta hori zen! Ikuskizunak suposatzen zuen diru zama, hango zarrastelkeria.

      Ongi etorri Europako Kultur Hiriburura!