Lehen antzerki liburua

Zein zaila eta etsigarria izan daitekeen zure ingurukoek, eta batez ere familiak, ez ulertzea, edo are okerrago, ez onartzea eta ez laguntzea egin nahi duzun hori gauzatzen. Nik zorte handia izan dut horretan. Nahiz eta hasieran etxekoek ez ulertu nire benetako bokazioa aktore izatea zela, aita eta ama beti izan ditut alde eta alboan. Horren adierazle izan zen aitak Madrilera joan aurretik oparitu zidan lehen liburua: Konstantin Stanislavskiren Un actor se prepara. Nork gomendatu zion? Non erosi zuen liburua? Inoiz ez diot galdetu, eta ez dut inoiz jakin. Berak ere ez daki Konstantin Stanislavskiren sisteman oinarritutako ikasketak egin nituela. Edo bai?