Poesiaren amaraunean

Poiesis

Poesia da arte guztien esentzia, gauza guztien esentzia. Poesiarik gabe ez dago ezer. Sorkuntza prozesu oro poesia da, edo hala beharko luke behintzat. Platonek, Oturuntza solasaldian, poiesiz hitza honela definitzen du: “Ez izatea izate bihurtzen duen kausa” (la causa que convierte cualquier cosa que consideremos de no-ser a ser). Poema hitzak egitea, fabrikatzea, sortzea, erditzea, lortzea, ekoiztea nahi du esan; zer da bada artean gabiltzanok egiten duguna? Demiurgoari heldu eta ekin.

Gabriel Zelaia

Mina Espazion artista ugari biltzen zen eta beti aurkitzen genuen aitzakia bat ekitaldi berri bat sortzeko. Horrela, Arantza Ugarte bilbotar lagunarekin eta Javier Landeras paisajistarekin Gabriel Zelaia poetaren errezitala ondu genuen. Ikasketa polita izan zen, irudiak proiektatuaz, poesiari ahotsa jartzea.

Ruper eta Sarri

Joseba Sarrionandiaren omenez Bilboko Kalderapekon ekitaldi bat egitera gonbidatu gintuzten: “Joseba Sarrionandia izeneko El Dorado-ren atzetik dabilen espedizioaren diarioa. Sarrionandia indioak ezkututik jaurtitzen zituen gugana zetozen geziak; poemak, narrazioak eta kantak, alegia”. Horrela aurkeztu genuen 2002. urteko abenduaren 19an, Bilboko Kalderapekon egin genuen ekitaldia.

      Jon Gerediagak eta Peru C. Sabanek osatu zuten gidoia, eta Ruper Ordorikak, Asier Ituartek eta hirurok parte hartu genuen ekitaldi xume eta eder hartan.

Gabriel Aresti

Bilboko Udaleko Kultura eta Hezkuntza Sailak antolatutako Bilbao Poesia literatur jaialdiaren barruan Animaliak Gabriel Arestiren poesian ekitaldia egin genuen Bidebarrietako Liburutegian.

      Hain poetikoa ez zen espazio hartan, Xabi Strubellen gitarraren laguntzaz, Arestiren zenbait poemari ahotsa jarri genion Miren Gaztañagak eta biok. Animaliez hitz egin genuen, baina hara ez zen animaliarik gerturatu.

Jon Gerediaga

Jon Gerediaga bilbotarra Mina Espazion ezagutu nuen. Berak txalaparta jotzen zuen eta bere lehengusu Alex Gerediagarekin batera Khea taldeko partaidea zen: Ke amigos somos zen taldearen izen xelebrea.

      Jon Gerediaga laguna. Jon Gerediaga poeta.

      2004. urtean argitaratu zuen bere lehendabiziko poema liburua, Fitola balba, karpuki tui. Bere poemak baliatuz irakurketa dramatiko bat osatu genuen, Miren Gaztañaga, Alex Gerediaga eta hirurok. Musika Aitor Agirianok egin zuen. Antzerkiola Imaginarioko errepertorioaren parte izan zen ikuskizuna. Jonen hitzez gain, Ainhoa Resanoren argazkiak, Aritz Merinoren irudiak, musikantak eta aktoreen ekintzak baliabide poetikoak bihurtzen zituen lana izan zen. Hemen poema liburu hartan dedikatu zidan olerkia:

ZURE BEGIEN GONBIDAPENA

Ander Lipusi

Esaiozu gabon ilargiari

bihar ez bada etzi agurtuko duzu berriz,

gorde ezazu hozkailuan

maitaleari eman beharreko hurrengo muxua,

utzi telebista

isiltasunaren paradisuaren partaide izaten,

ez esan gero

gaurkoa sekulako partidua denik

ez daukagu errietan hasteko gogorik,

utz ezazu periodikoa aurkitu duzun lekuan

elur-malutak bezain iraunkorrak dira bere egiak,

liburua?

Liburuak joandako gurdi beteen lorratzak dira

baina ez dira gurdiak,

eskegi telefonoa

kobrea ez da malko eta muxu hezeen eroalea,

laga lagunak gerorako

goazen lekura ez duzu lagunen faltarik sumatuko,

laga etsaiak

edozein lekutan aurki dezakezu etsai berriren bat,

ahaztu zure amets guztiak

paperezko haize-orratzak dira gaur

zure amets zaharrak,

ekar itzazu zure amesgaiztoak

beharbada ez dute bueltako bidea aurkituko,

irten tabernatik

ardoak ez zaitu behar beste zorabiatuko,

atera ohetik, amatatu argiak

eta utzi zabalik zure palazioko ateak

ipurtargien laguntzaz aurkituko dugu gonbidatuen gela,

zabaldu bihotz-begiak eta hartu labirintora doan bidea

ez dago galbiderik, labirintoan noraeza dugu norabide

eta noraezean doa komedianteen karabana.