Marxkarada

Lekeitioko Kale Antzerki Jaialdian Karlos Panerak zuzentzen zuen Maskarada antzerki taldea ikusteko aukera izan nuen. Marx anaietatik abiatuta Marxkarada komediazko obra ematen zuten. Patxo Telleria, Mikel Martinez eta Inazio Tolosa Groucho, Chico eta Harporen azalean sartzen ziren hurrenez hurren, Marife Berrojalbiz oholtza kide zutelarik.

      Lekeitioko Isuntza hondartzaren goiko aldean eman zuten, Emperatriz Zita parkean, eta jende andana bildu zen. Ni lehen lerroan nengoen, adi-adi. Ikusten nuen bitartean kili-kiliak sentitzen nituen gorputz osoan. Nik jada nire burua han ikusten nuen, hau da, eszenatoki baten gainean, antzerkia egiten. Eurak bezala.

      1977. urtean sortutako Euskal Antzerki Taldeen Biltzarra (eatb), beren emanaldi guztiak soilik euskaraz eskaintzea erabaki zuten taldeek osatu zuten. Garai hartan euskara hutsean ari ziren antzerki taldeen ibilbideak gaur egun ere oihartzun egiten du. Batzuk aipatzearren: Kukubiltxo (Larrabetzu), Goaz (Deba), Taupada (Elgoibar), Intxixu (Oiartzun), Antxieta (Azpeitia), Hirurak bat (Lakarra, Gamarte eta Ainhize-Monjolose), Bordaxuri (Hazparne), Xirristi-Mirristi (Baiona). Eta Maskarada: euskarazko teatro profesionalaren aitzindariak. Talde hauei, eta aipatu ez ditudan beste herri antzerki eta talde askori, eskertu behar diegu euskarazko teatroa egiteko izan duten gogo eta kemena. Intxixu taldean ibilitako Xabier Leteren hitzak gogora ekarriz:

Gu sortu ginen enbor beretik sortuko dira besteak,

burruka hortan iraungo duten zuhaitz-ardaxka gazteak.