Furgoneta III

Bidaia bukatzear dago. Berrogeita hamar urteko esperientziaren kontakizuna hemen nahasten da orainarekin. Euskal Herrian biran jarraitzen dugu. Plazaz plaza. Begi harrituekin begiratzen nien umetan/gaztetan Markina-Xemeinera etorri ziren komediante haiei. Bere furgonetan nola sartzen zituzten atrezzo, eszenografia, soinu ekipo eta jantziei. Euren izerdi eta euren ametsei begira. Orain, nire izerdi eta ametsei begira nago.

      Aulestiko topaketetan emanaldiak hasi baino ordubete lehenago, atean zain egoten da bederatzi urteko mutikoa. Oier deitzen da. Gurasoek egindako ogitartekoari aluminio-papera kendu eta poliki-poliki jaten du. Ilusioz betea, emanaldia ikusteko zain. Behin barrura sartuta, Oierrek egiten ditu emanaldi aurreko aurkezpenak. Ikusleei ongi etorria egin, mugikorrak itzaltzeko esan eta ikusiko dutenaren berri emanez. Etxera itzultzen naizenean Oierrengan pentsatzen dut: egiten dudanarekiko ilusio eta poz berdina nahiko nuke mantendu hurrengo urteetan.