Malabarak

Hain dago desprestigiatuta kultur jarduna,

non ogibide denetan ere sortzailea
baita kultur sisteman katebegirik ahulena.

Oier Guillan, Zauri Bolodia

2018ko udan, Gure zirkua ikusteko aukera izan nuen. Proiektuaren bultzatzailea da Iker Galartza. Lagun (ezagun) batzuk ari ziren bertan lanean, Koldo Arakistain, Iraitz Lizarraga, Joseba Usabiaga, Ekain Ibarguren… Zumaiara joan ginen ikustera. Kasualitatea edo ez, sorgailua hondatu egin zen eta zirkua argindarrik gabe geratu zen. Ez musikarik, ez fokurik, ilunean eta isilunean geratu zen dena. Niretzat hura izan zen ederrena. Haurrak eta gurasoak pistara begira zeuden, aho zabalik. Gure zirkuko artistek erakutsi zuten balentria, gogoa eta kemena ikuskizunarekin aurrera egiteko ikaragarri ederra izan zen. Bihotzak agintzen duenean, beste guztiak berdin dio.

      Berdin dio? Gure ofizioan gehienetan bihotzetik egiten dira gauzak. Pailazoak gara, bai. Bufoiak. Komedianteak. Sokaren gainean gabiltzan ekilibristak. Tentuz, astiro-astiro. Ostia noiz hartuko. Gizartean ez omen gara hain beharrezkoak. Erraz ematen digute bizkarra. Hortaz, antzerkilariok, eta orokorrean arte munduan gabiltzanok, malabarak egin behar izaten ditugu hilero soldata duin bat ateratzeko.