Amancay, bihotza sendatzen duen lorea

Uxue Alberdiren Euli-giro ipuin liburua izan zen Miren Gaztañaga, Erika Olaizola eta Amancay Gaztañaga elkartzeko aitzakia. Ibilbide desberdinetatik zetozen hiru aktore ziren, baina antzerkiaren zein generoaren hausnarketaren inguruan partekatzen zituzten hainbat ikuspegigatik batu ziren. Uxue Alberdi, Sylvia Plath, Mari Luz Esteban, Danele Sarriugarte eta beraien testuetan oinarritutako Euli-giro ikuskizuna izan zen euren lehen proiektua, eta horrela sortu zuten 2014. urtean Kamikaz kolektiboa. ^[68]

      Amancay prentsaren bidez jarraitzen nuen. Pertsonalki, Azpeitiko Soreasu antzokian ezagutu genuen elkar antzezlan baten ondoren. Hortik aurrera, bere lana hurbilagotik jarraitzen hasi nintzen. ^[69] Elkarri pista jarraitzen genion eta, memento batean, zerbait egin ahal genuela ikusi genuen. Bi urteko lan prozesua eraman genuen eskuz esku eta, azkenean, Artedramaren ekoizpenarekin Atzerrian lurra garratz zuzendu zuen, Huts Teatroaren laugarren antzerki lana izango zena. Ikasketa bat izan zen denontzat. Laura Penagos aktore kolonbiarraren bizipenak eta intuizioak taula gainera eraman genituen. Pandemia garaian mila zailtasun eta eragozpen izan bagenituen ere, lortu genuen lan eder bat burutzea eta plazaratzea. Amancayren begiradak eta ekarpenak ikuskizuna borobildu zuen.

      Ekuadorren, kitxua hizkuntzan bada amodio istorio bat lore baten inguruan. Lore horren izena Amancay da. Bihotza sendatzen duen lorea omen da.