LABORATEGI ANIMIKOA

Horra heriotza:

ebakuntza mahaian,

azterketa-gai bilakatua

probeta baten barruan,

lupatik mikroskopiora,

mikroskopiotik arimara,

ezin diote barrunberik ikusi

erlijioentzat mehatxu nagusi

—manipulazio sistema goretsi—

bilakatu denari.

Begira musulmanak,

kristauak, metodistak

edo protestanteak

esperimentu ezberdinak egiten,

zein baino zein

paradisu bikainagoak eskaintzen,

honetara edo hartara

jendea erakarri nahian,

begira nola artaldeak

osatzen dituzten, jendea ergeltzen,

ergelak ezjakin bilakatzen,

eta ezjakinak zalantzatien borrero.

Asmatzen dituzte ipuinak,

kontakizunak,

zentzu itxura nahi luketen atalak,

baina heriotzak ihes egiten du

beti hatzen artetik.

Bost segundo aski,

ospitaleko gelan izan da;

istant bat,

eta kamioi azpira joan den

autoan izan da.

Heriotza ez da aingira bat,

ez da mirotza,

bila datorkizuna,

unerik bereziena baizik,

bizitza bere osotasunean

maite baduzu

hura ere maita dezazun

eskatzen dizuna.