METASTASIA

Arbolak astintzen

seinale batzuen bila

gabiltza sarritan,

patuaren hizkera sinbolikoa

ulertu nahian

hostotzaren erdian.

Autobusean zure gustuko kanta

mugikorrean entzuten doan neska

ez ote da zure

betirako bikotea izanen?

Jaisterakoan zerbait

esan ahal diozu,

txiste bat telefonoaren trukean...

Xoxoa agertu zaizu

belardian kantari,

mokoa hori,

duela mende erdi bat

hildako aitona

ote bisitari,

xoxoei kantuan irakasten ziena?

Eskua luzatu dizu kartoi artetik

Afrikako emakumeak,

munduko erruki guztiari deika

haren begi beltzak,

ez ote duzu behingoz

—sarri pentsatu legez—

zure bizitza erosoa

aldatzeko dei bat?

Horoskopoan leitu duzu,

jadanik ba omen dakizu

gogo-ekaitzen erantzuna, horratx!

Bazoaz dakizunaren bila

ameskerietan egotetik

zerbait praktikoa egiten

hasteko orena

iritsi dela sinetsita.