BOROBILA ETA PUNTUA

Uterotik mundura,

hori denek ulertzen dute.

Baina mundutik nora?

Hara noraeza

asmatu zuen galdera,

milaka urtetan

erantzun ez duguna.

Edo erantzun izan dena.

Baina hargatik ez da desagertu

gure dardara:

Uterotik mundura...

Baina mundutik nora?

Banaka iluminatuen erantzunak

talde-arau bihurtu zirenean

sortu ziren erlijioak,

izaki askea jopu egiteko

tresna harrigarriak.

Baina aske izan denak

une bereziak baititu gogoan,

beti ditu bilatzen

askatasun izpiak gauean.

Eta galderak lasaitu ala larritu

egingo duen jakin gabe,

existentziarekin erdietsitako

sinbiosi unerik gorenean,

galdera jaurtiko du

lurreko lehen gizaki gisan:

Mundutik nora?

Krudela erantzun falta.

Ala askatzailea, agian,

bakarrik kokatzen duelako

unibertsoaren erdian?

Haratago ere baikaramatza

denboraren jolasak,

norabide ugari dauzkan

haren hareazko hatzak:

Uterotik mundura,

hori denek ulertzen dute.

Baina nondik uterora?

Mundutik nora dagoen hutsunean

ixten baita

uterora nondik

ekarri gintuen zirkulua.