Asia eta Afrikako idazleei

Anaiok,

ilehoria banaiz ere

asiarra naiz

begiurdina banaiz ere

afrikarra naiz

han ene herrian zuhaitzak ez dio bere enborrari itzal egiten

                             zuenean legez

han ene herrian ogia lehoiaren ahoan dago,

                   herensugeek iturrien magalean egiten dute lo

                   eta jendea berrogeita hamarrak bete aurretik hiltzen da

                           zuenean legez

ilehoria banaiz ere

asiarra naiz

begiurdina banaiz ere

afrikarra naiz

nire herrikideen % 80k ez daki ez irakurtzen ezta idazten ere

eta hala ere, poemak ahoz aho dabiltza eta kanta bihurtzen dira

han ene herrian poemak bandera bihur litezke

                            zuenean legez

gure poemek, gure idi gosetiekin bat eginik,

                            lurra lantzeko gai izan behar dute

gure poemek arroz-soro zingiratsuetan belaunetaraino

                                      aritzeko gai izan behar dute

galdera orori erantzuteko

argi guztiekin bat egiteko

gure poemek kilometrotako mugarri tinkoak izan behar dute

inork baino lehenago bistaratu behar dute etsaia hurbiltzen

oihaneko tam-tamak jotzeko gai izan behar dute

eta Lur osoan herri bat pertsona bat loturik deino

zeruan hodei atomiko bakar bat ageri den artean

gure poemek prest egon behar dute arima, gogoeta, adimena eta ondasun oro

                                      askatasunaren alde emateko

Moskun, 1962ko urtarrilaren 22an