Autobiografia

 

1902an jaio nintzen

ez naiz egundo sorterrira itzuli

ez dut laket atzera egitea

hiru urterekin Alepon pasharen biloba izan nintzen

hemeretzi urterekin Moskuko Unibertsitateko ikasle

berrogeita bederatzi urterekin Moskura itzuli nintzen

eta hamalau urte nituenetik poemak idazten ditut

 

batzuek mila belar mota ezagutzen dituzte, beste batzuek arrainak bereizten dakite

                                              nik banaketez dakit asko

badira izar bakoitzaren izena dakitenak

                                              nik nostalgiaren izen guztiak ezagutzen ditut

 

kartzeletan eta hoteltzarretan egin dut lo

gosea pairatu dut, probatu ez dudan platerik ez da, gose-grebakoa barne

 

hogeita hamar urte nituela urkatu egin nahi izan ninduten

berrogeita zortzirekin Bakearen domina eman zidaten eta

hogeita hamasei urterekin, sei hilabete behar izan nituen

lau metro karratu hormigoi goibel korritzeko

berrogeita hemeretzirekin hemezortzi ordutan joan nintzen Pragatik Habanara

1951n itsaso batean lagun batekin heriotzaren gainean ibili nintzen

1952an bihotza kraskaturik lau hilabete eman nituen heriotzaren zain ahoz gora

 

maite nituen emakumeekin sano arduratsua izan naiz

ez diot inori bekaitzik izan ezta Charloti ere

emazteei adarrak jarri nizkien

ez nintzen lagunei buruz gaizki esaka sekula ibili

 

edan dut baina ez naiz hordia izan

neure bekokiko izerdiaz irabazi dut ogia

zorionekoa, ni!

 

auzo-lotsa sentitu dut

gezurra esan dut

errukiz esan dut gezurra

                            baina sekula ez ausaz

 

trenean hegazkinean autoan bidaiatu dut

gehiengoak ez du lortzen

operara joan naiz

                            gehienek zer den ere ez dakite

hogeita bat urte ditudanetik ez naiz

                            meskitara, elizara, tenplura, sinagogara…

                            gehienak joaten diren lekuetara joan

                            baina laket dut etorkizuna kafe hondarretan irakur diezadaten

 

nire lanak berrogei hizkuntzatan inprimaturik daude

                            baina Turkian eta ene hizkuntzan, turkieraz, galarazita daude

 

oraino ez dut minbizirik,

ez da baitezpadakoa

ez naiz egundo lehen ministro edo

antzekorik izango, nahi ere ez

gerrari uko egin nion baina

ez nintzen gauerdian babeslekuetara jaitsi

ez nintzen errepideetan narras ibili goitik behera zetozen hegazkinetatik ihesi

hirurogei betetzear nituela maitemindu egin nintzen

hitz gutxitan, lagunok,

gaur Berlinen xangrinak jota nagoen arren

                            duin bizi izan naizela esan nezake

bizitzeko dudan denboran

                    zer gerta dakidake?

                                    nork daki?

 

Ekialdeko Berlinen, 1961eko irailaren 11n