Halaxe esan zion Menderesi Korean hil zen gure erreserbako ofizieretako batek

Odolaren prezioa

Adnan Bey, bi begi zuhur, zital, olibaren pareko horiek

      bere lekuan dituzularik,

            harro zaintzen dituzu zure besaulkitik

                  asanblada

                        zure jabetzak

                              eta taloitegia.

Adnan Bey, bi esku haragitsu, zuri, izerditu eta labainak

      bere lekuan dituzularik laztantzen dituzu

            zure ile engominatua

                  zure dibisak

                        eta zure maitaleen bularrak.

Adnan Bey, zure aldakak baino zabalagoak diren

bi hankak bere lekuan dituzularik,

Eisenhowerrekin bildu zara

eta gehien kezkatu zaituena,

      zure bi hankak elkartzen diren atzeko gorputz atal hori,

            herriaren ostikadatik salbu dago.

Ments ditut bi begiak.

Ments ditut bi eskuak.

Ments ditut bi hankak.

Ez naiz.

Adnan Bey, Korean hil zenuten unibertsitateko

            erreserbako ofizieretako bat naiz.

Zure eskuek heriotzara bultzatu ninduten

            zure esku izerditu, labain eta haragitsuek.

Zure begiak sorbaldan iltzatu zitzaizkidan

zure hankek autoan ihes egiten lagundu zizuten

            nire odol gorritan hiltzen ari nintzelarik

                  nire oihuak entzun ez zenitzan.

Baina ni, Adnan Bey, atzetik joan nintzaizuen

Hildakoak autoak baino azkarragoak dira

            itsuturik, eskuak apurtuta, hanketatik elbarri

                  atzetik joan nintzaizuen.

Adnan Bey, nire odolaren ordaina nahi dut

begia begi truk

eskua esku truk

hanka hanka truk

nire odolaren ordaina nahi dut

lortuko dut.

1959ko ekainaren 25ean