Rafeef Ziadah-ri

zenbatzen ditut egunak

zenbatzen ditut harlauzak

zenbatzen ditut billeteak

banderak eseki eta ilaratan eseri

gara argi gehienak itzalita — amorruaz

eta fedeaz eta esperantzaz aritu gara — fedea

molotov koktel bat dela eta esperantza

eguzkitan utzi behar dela, gutxi ureztatu

burkidetasuna da ahaidetasuna —

familia askotan bizirik irauteko era bakarra —

bizirautea bera gehienetan sendi bakarra

deserriratuek eta haien herrialdean bertan

errefuxiatuak direnek eskuetan idazten dituzte

euren herrien izenak — poema bat

Khan Yuniseko etxe aurrituetan

egunak zenbatzen ditut — hilabeteka

harlauzak zenbatzen ditut — gehiegi

billete lohiak zenbatzen ditut —

idazteko eta irakurtzeko eta itzulpenak egiteko

baduzu indarrik, dantzatzeko beste — gure izenean —

haienean — amore emateko eskubidea

kendu diguzu barre kolpe batez

idazteko, ureztatzeko, kantatzeko bai,

amore emateko eskubiderik ez dugu