UMEZAROAREN ASMAKUNTZA

duela 100 urte ez zegoen umerik edo gaztetxorik —

zeuden heldugabeak, ezkontzeko gazteegiak, edo

konskripziorako kinttopekoak zeuden —

umerik ez

Krupskaiaz hitz egin digute gaur — eta barretxoa

egin dugu umeen lana ez zuelako ezbaian jartzen —

nolakoa izan beharko lukeen esplotazio ez

izateko eta nola antolatu du hizpide — ez

lana bera — eta zein urruti geratzen zaigun

umezaroa santifikatu duen garaian

baina Guda Post-Hotz honetan inperioaren mugaren

bi aldeetan ikusi ditugu gaur —gaur-gaur—

umeak lanean — oraintsu hil da gaztetxo bat

lantegi yanki batean — eta eskolarik

gabeko Gazan senideak elikatzeko

lantxoak egiten dituzte

umeek — kozinatu, saldu, gauzak konpondu

umezaroa asmatu eta sakralizatu dutenek esaten

didate eurenak gazteegiak direla sexualitateaz

hitz egiteko — utz diezaiegula ume izaten

ume izaterik duten bitartean, ez

ditzagun heldu izatera gazteegi behartu —

12 urte baino ez dituzte

zuk zeuk ume izatera itzuli nahiko zenuke,

orain dakizunarekin, proiektatzen duzun

umezaro faltsu batera itzuli, baina

12 urtekoak masturbatu egiten

dira, gizona — zure semea

bereziki — 12 urtekoak lantegietan

hiltzen dituzte eta hondartzan eta

eskolarik gabeko ikastetxeen jolastokietan — eta

haien neba-arreba gazteak euren gorputzez

—sexuatuak— babesten dituzten bitartean

nago umezaroa asmatu zutenek ez zutela

kontzeptu unibertsal eta interklasista bezala

asmatu — denak unibertsal eta inter-

klasista izateko borondatea

duen garai honetan ere