AITAREN HERIOTZAK
ASKEAGO EGIN NAU

aitaren heriotzak lokarri bat kendu dit

eta askatasun handiagoa dut orain

gutxiago dira bizitzara eta mundura

lotzen nauten sokak

gutxiago mugimendua mugatzen didatenak

aitaren heriotzak libertatea kendu dit

libertatea eskailera bat baita eta

nik urrutira begiratzeko baliatzen

dudanaren maila gehienak berak

jarri zituen nire oinen azpian

askatasuna eta libertatea ez

doaz beti eskutik, bata erantziz hazten

da, bestea metaketarekin

ideiaz ideia altxatu ninduen aitak

zorutik gora

eskaloiak eskuz eta hitzez landuz

lur gogorrean

berak sekula ikusi

gabekoak ikus nitzan nik lainoen

gainetik

kobazuloko itzalez haraindi

lotura bikoitzaz jagon ninduen

lokarri doblez maitatu

eta ito egiten nintzen usu pausoak

emateko saiakeran

aitaren heriotzak lokarri hori

zartatu du eta mugitzeko aske

naiz gaur atzo bainoago

hautatzeko alabaina libre

izan behar eta jada ez naiz

sekula libreago izango