TESEOREN ALDERDIA

genealogia bat aldarrikatzen duzue

“Teseok partiduan sinetsiko luke

gaur atzo bezala”

oholez ohol berregindako belaontzia

yate bat da orain

garaiak hala eskatzen omen

baina —bien sûr— debeku denborako

su berbera ei du

kubiertaren azpian

genealogia batean babes hartzen

duzue herentziaren merezimenduak izateko

Teseoren oinordeko izateak

bai baitu kreditu alimalekoa

Teseo bidenabar xixareek

jan zuten eta Teseoren

barkuaren egurrak bidenabar

onddoek dituzte jan

herentzia jaso egunean

bertan egin ez den konponketarik

alferrik landuko duzu beranduago eta

kasu

zer gerta

argi izan baietz

alderdi horretaz ari naizela