Herria da subiranoa, etc., etc.

Iñigo Astiz

Euskalerria ez da herri bat. Herri bat izan nahi

duen interes ekonomikoen aliantza hauskor bat da

Euskadi ez da artxipelago bat. Da uharte

abandonatu batean bi naufragoren hauteskunde

kanpaina amaiezina — hiru hautagai

dituen bi biztanleko irla

Euskal Herrian Bilbo ez da hiri bat, uri bat, herri

bat. Bilbo, Euskadikoa, ez da bilbotarren uria, ez

da bilbotarren etxea. Salgai dauden erakusleihoak

dira eta tapiatutako etxebizitza hutsak

Bilbo, EAE, ez da egurrezko txalupa, ez

da egurrezko zubia, ez da egurrezko mahaia.

Ez da titaniozko itsasontzia, ez da titaniozko

urpekaria, ez da titaniozko zepelina.

Bilbo plastiko fina da, baldin eta fin

mehe eta merke bezala ulertzen badugu

Bilbon, CAVen, omnia sunt

communia — dena da Erkidegoarena

Euskalerriko Bilbao ez da lorategi bat, estatuak

dituena. Bilbao fantasmen estatuek itotzen duten

sastraka da, etxean zaudenean, kalean eserita

zaudenean, eraikin okupatuetan ari zarenean

inguratzen zaituzten eskultura

armatuak, armatzat kea, sirena hotsak eta arropa

zahar lizunduen usaina dituzten fantasmak

Bilbao, CAPV, hotel merke bat da, a cheap

motel, a cozy hostel in northern Spain

Euskalerria ez da baserri bat, Ager Vasconum ez da

mendialdea, EAE ez da karlistada, Nabarra non da

Bilbon bizi dena ez da bilbotarra, bilbotarrak ezin

du non jaio erabaki orain, Euskalerrian lan

egiten duena ez da baskoa, EAEn enplegu

bat izatea jada ez da euskal langilea izatea

Euskal Herria ez da herri bat izan nahi duen

jende multzo bat baizik eta jende horren ekinak

uzten duen arrastoa