bekainak orraztu nizkizun

zure urguilu izandako bekain salbaiak

erdi genetikoak

ebakiondo (asmatu) baten ondorio

erdi

azkenekoz ukitu nahi zintudan

fereka zuzen eta zintzo bat

akaso lekuz kanpo zegoena gure harremanean

akaso hil-jantziaren pean

desegindako eta berreraikitako

gorpu bat zegoela jakitun

hobe da hilkutxa itxita egotea

autopsian dena ebaki zabaldu eta

mugitu behar izan dute —

ez

beste behin begiratu nahi dut

gorpuaren egoera edozein izanda ere

azkenekoz ukitu nahi zintudan

muxu bat arrotzegia zen

niretzat han orduan guretzat

beldurrak beldur

lan ederra egin zuten

zu zinen herio kaxan

zu zinen haserre maskararen

aho okertuarekin —

bekainetan ez

bekainetan ez zinen zu

mendikate luizitu bi

begien gainean —

orraztu egin nizkizun

bero zen gelan

bero urdin epela barnean —

zure gorpuaren hotzak

errukirik gabe hartu zizkidan

hatzen puntak — kanoikada

krudela, nire bizkar muinean

atzaparrak tenkatzeraino

azkenekoz ukitu zintudanetik

eguzkiaren bila nabil

sekula ez bezala

hotz horren apaltzearren