kontua ez da presaka ibiltzea, inori inongo

erritmorik inposatzea — kontua ez da maitasunaren

gorazarre zaharkitu bat egitea — ezta gorazarre

sasi-meta-moderno punkia

egitea eta epelen saldoaren

kontrako manifestu bat

sinatzea ere, epelen kontra gauden arren — baina ez

gaude nahi duguna nahi dugula

ezkutatzeko hemen, ez gaude aurrera

egiteko beldurrez bidearen albo batean

geratzeko — ez da marrazo pentsamendua

giza harremanetara ekartzea ere eta har beza

bakoitzak nahi duena — esan gabe doa

gibelean dugun zauria plazan erakusteko tenorea

dela esan gura dudala uste dut, gure aiherrak besteen

aurrean agertzeko lotsarik gabe — bi hauek

ez bezala, haien artekoa (dena delakoa) ezkutuan

bizitzen hiru urtez, edo nola ez duzun, Anari

isiltzen denean, begietara begiratzen — desira

estalita bizitzera behartu dugula esan gura

dudala uste dut, mozorrotuta — eta balitz xomorro

jostari, balitz drag, balitz hautu — baina

ez, obligatu dugu tapatuta bizitzera, gordean

eta kukututa — erosotasunaren izenean, norberarena

aurrena — eta eroso egotea da

finean bizitza, ez ala?

desiratzen dugulako gara eta izango

bagara desiratzen izan beharko dugu,

bai eta maitatuak (desiratuak esateko beste

hitz bat baino ez da) izateko moduan —

eta horrek begietara begiratzea esan nahi

du eta eskua luzatzea