NIRE AUZOA

Evariste Baignolen

beste egun bat da gaurkoa

kale garbitzailea udatiarrak balkoitik

botatako zigarro muturrak jasotzen ari da

sncfko Begnat jubilatuak ehiza arrazako

zakurra sartu du Clio auto zaharrean

lanak direla-eta madarikazioa du

murtxikatzen txiklea bailitzan

buruan tumorea duen Jean-Michel

ospitalera joan da scanner bat egitera

udaltzainak isuna ezarri dio

gaizki aparkatuta dagoen autoari

eta beheko biribilgunean elgarretaratzea

antolatu dute urteko egunik tristeenaren aurka.

Portuges jatorriko Margaida

haur batez erditu da atzo

—Wenda, gazte borrokalaria

esan nahi du—.

Kostaldeko Done Jakue bidea igarotzen den

kartier historikoan da Evariste Baignol kalea

bertatik dira igarotzen

erromesak Compostelara bidean

ilargi beteak farola handi bat dirudi

hemendik begiratuta

Evariste Baignol auzoan

denok ezagutzen dugu elkar

etxerik dotoreenak bota eta berriak eraikitzen

dituzten paristar aberatsak izan ezik.