AVATAR

Batzuetan azkordinak beratzen

ipintzen ditut palankanan,

kopetilun etortzen naiz

animalia zauritu baten antzera

ahutzak erakutsiz.

Bestetan krater hautsi bat naiz,

erupzioan sartzen naiz abisu eman gabe,

eskuak hasten zaizkit lurmentzen

edo ostadarra agertzen da

nire betazal tatuatuetan.

Odolezko ilargipe honetan

behialako glaziar urtua naiz,

ziklogenesiaren begia akaso,

itsasaldetik datorren galerna.

Batzuetan ibai, bestetan istil,

noiznahi desertu, noiznahi oasi,

edo sumendi, edo zelai.

Leize bat naiz emozioen kartografian,

eraztun bat enborraren erdokan.

Zure metabertsoko avatar inperfektua naiz.