ARGAZKI ZURI-BELTZA

Horma arrakalatuak zituen

kale-baserri hura dut gogoan

—rouge basque koloreko

ate-leihoak—

laratza zuen salan

hortentsiak atarian

bi behi argal zeuden sartzean

paretaren kontra lotuak

ekonomikaren gainean

sukaldatzen zuen bertako amonak

argazki zuri-beltzean dagoen

kale-baserri hura dut buruan

lur azpiko aparkalekua duen

etxe kotizatu bat dago orain:

à vendre