NAHI DUZUNEAN

Zatoz orain irribarre guztiak izoztu diren honetan

zoriak leihora hartxintxarrak botatzen dizkizunean

erdu zeure tragedia grekoa pairatzen ari bazara ere

gauminak konfiskatzeko bandoak hedatu ondotik

erantzungailuan mezu zaharkituak dauden arren.

Zatoz inoren belardian etzateko gai ez zarelarik ere

bibak inprobisatua ezartzeko asmoz zaudenean

erdu lotsagabe besarkaden negutegitik

ez utzi ordulariari denbora ebasten

ez utzi koman diren pentsaerak besteen eskuetan

barkatzeko prest, baina ahazteko ez zauden arren.

Zatoz damurik gabe zeruertza arakatzen duzularik

goizargia urrikaldu baino lehen

galdutako lorratzen bidetik

zatoz nahi duzun eran

begirada bere galerarekin eta

denbora bere zauriekin gelditu diren honetan.

Zatoz

esku zabalik hartuko zaitut.