MON FRÈRE

Zure noraezaren deia jaso dut mugikorrean,

hatsalboka egin duzu

Nazioarteko zubiaren honaindira,

poliziaren argiak atezuan dira Bidasoaren gainean,

auto guztiak gelditu eta miatzen dituzte,

paperak, galderak eta begiradak,

txarrantxa-hesi gehiegi gauza onerako.

Zaldi izutuaren begiekin heldu zara,

gau honek ez du ihesbiderik eskaintzen,

hemen amaitzen da gaurkoz zure exodoa;

nondik zatoz, nora zoaz, zein da zure izena,

hitz gutxi eta urduritasun handia,

eskularru bustiekin estutu didazu bostekoa,

mon frère deitu nauzu gero.

Gaueko hamabiak, berandu da,

etxera sartu naiz nire larriminari

pasabide humanitario bat ireki ondotik.