POZIK ZATOZ

Arratsaldeko zortzi eta erdiak dira

eta eguzkia gorenean

da oraindik

hondartzatik zatoz

harea aleak oinetan

txirrinda zaharra

eskuetan

etxerako aldapa igotzean

bularra hauspotu zaizula

nabari da

eguzkitako betaurrekoak

buru gainean

kresal usaina dario

zure azal brontzeatuari.

Brokante azokan

erositako sandalia greziarrak

erantzi eta dutxan sartu zara

bizitza berez dator

xalo eta arin

ez inork, ez ezerk

ez du behartzen izatera

buruan toalla eman duzula

ikusi dut erdi irekitako atetik

“agorrilak urte osoan

iraun beharko luke”

esan didazu

zangoak depilatzen

dituzun bitartean.