GERO ARTE

Iratzargailuak betiko tenorean esnatu zaitu,

astelehena da zure laneguneko agendan.

Burukominez jaiki zara

gaur ere

gogokoen duzun trixerta jantzi duzu

galtza bakeroak lotu ondotik.

Ohea egin, hortzak garbitu,

Euskadi Irratia ezarri dialean (94.0 FM) eta

kafea mikrouhinean berotzen ipini duzu.

Zabor-poltsa betea, beti bezala.

Segurtasun Sailetik kontuz ibiltzeko esan dute

Irun-Behobiako noranzkoan.

Zaku bandoleroa bizkarrean, Converse zapatillak lotu

eta bazoaz Efferalgan bat irentsita.

“17:30ean mamografia” idatzi duzu post-it batean,

berandu zabiltza betiko legez.

Atea bizkarrean tanpez itxi eta joan egin zara

eskuaz muxu bat airean grabitatzen utzita.